الحلقة الرابعة....الادغام (احكام النون )

بسم الله الرحمن الرحيم

نستكمل بمشيئة الله تعالي الحديث عن النون الساكنة والتنوين

....
استعدوا هناخد النهارده حكم عايز تركيز شوية.....بس لو اتقنته هيفرق معاك كتير

حكم ....الادغام

هابدأ الأول بكلام أكاديمي علشان بس مش نحس ان احنا قاعدين في الشارع.....هو صعب شوية بس لو ركزت هتفهمه.....وبعد كده هأجيبلك من الآخر

القسم الثاني: الإدغام

والإدغام لغة: إدخال الشىء في الشىء، واصطلاحًا: التقاء حرف ساكن بمتحرك فيصيران حرفًا واحدًا مشددًا يرتفع اللسان عنده ارتفاعةً واحدة.

واعلم أن النون الساكنة والتنوين يدغمان في ستة أحرف هي: الياء المثناة من تحت، والراء والميم واللام والنون والواو مجموعة في قول القراء: "يرملون". وهي على قسمين:

الأول: الإدغام بلا غنة:

وهو أن يدغما في اللام والراء إدغامًا كاملاً بلا غنة نحو:{من لم}، و:{لا عبرةً لمن}، و:{من ربّكم}، و:{محمدٌ رسول الله}.

وعلة ذلك قُرب مخرج النون والتنوين من مخرج اللام والراء لأنهن من حروف طرف اللسان، فتمكّن الإدغام وذهبت الغنة في الإدغام.

الثاني: الإدغام بغنة:

وهو أن يدغما في الأربعة الباقية من: "يرملون"، مجموعة في حروف "ينمو" فتدغم إدغامًا غيرَ مستكمَل التشديد لبقاء الغنة نحو:{من يقومُ}، و:{برْقٌ يجعلون}، و:{من ورائهم}، و:{وهدًى ورحمة}، و:{من مآءٍ}، و:{صراطٍ مستقيم}، و:{مِن نعمة}، و:{حطّةٌ نغفر}.

وعلة الإدغام في النون التماثلُ، وفي الميم التجانسُ في الغنة، وفي الواو والياء أن الغنة التي في النون أشبهت المد واللين اللذين في الياء والواو فتقاربا بهذا فَحسُنَ الإدغام، وتدغم الغنة مقدار حركتين.

ويستثنى من ذلك ما لو كان المدغَم والمدغم فيه كلمةً واحدة فلا تدغم بل ينبغي إظهارها لئلا تلتبس الكلمة بالمضاعف وهو ما تكرر أحد أصوله، لذلك قالوا لا تدغم النون الساكنة في الواو والياء إذا اجتمعا في كلمة نحو:{صنوان}، و:{والدنيا}.

الكلام صعب ولا ايه....معلش

تعالي بقي نحكي براحتنا.....بص ياريس

ادغام النون يعني مش هتنطق النون والتنوين نون زي الاظهار كده....لأ
انت هادخلها في الحرف اللي بعده
وزي ما الاظهار له 6 حروف
الادغام برضه له 6 حروف
والحروف دي
ي ر م ل و ن
مجموعة في كلمة يرملون
يعني لما تلاقي بعد النون أو التنوين حرف من حروف يرملون......تنبقي النون دي تاخد حكم ايه......برافو
ادغام

وانا بحب أقول جملة بتسهل عليا الحكم ده

أول لما تشوف يرملون.....ارمي النون

يعني ببساطة اعتبر ان النون مش موجودة....يعني هتدخل النون في الحرف اللي بعدها علي طول

بس خد بالك ان الادغام نوعين
نوع بغنة

ونوع من غير غنة

بغنة لو جه بعد النون ي-ن-م-و.......متجمعة في كلمة ......ينمو

من غير غنه لو جه بعد النون.....تفتكر ايه......بالظبط
اللي فاضل من يرملون......ر- ل

بص بقي علي السريع علي الصورة دي وركز

تكبير الصورة تصغير الصورة تم تعديل ابعاد هذه الصورة. انقر هنا لمعاينتها بأبعادها الأصلية.

بص طبق معايا الحكم بسرعة وسيبك من الغنة هتتعلمها اكتر من الملحق الصوتي اللي هاضيفه مع الحكم

لو قلنا مثلا

مَن يَقُولُ

انطقها بقي ياحلو

ايوة بالظبط....النون ساكنة مش متحركة يبقي أدور علياحكامها ...واحد من أربعة.....
ايه اللي جه بعد النون.....ي
يبقي تاخد اي حكم.....ي....تبع كلمة .....يرملون
يبقي تاخد ادغام.....برافوووووو
تنطقها ازاي.....
احنا يعني ايه الادغام....يعني تدخل حرف في حرف....يعني هتدخل النون في الياء
انا مش قلتلك....
أول لما تشوف يرملون .....ارمي النون

يبقي أخيرا تنطقها ازاي.
.
.
.
أيوه بالظبط
هتقول

مي يقول
انا كتبت الياء مرتين لأن ده ادغام بغنه أنا لو اعرف أكتب شده كنت كتبتها علي الياء
انما بالظبط انت هتنطقها ....مي يقول

يالا نجرب تاني

مِنْ وَلِيٍّ

انطقها
أول ما تشوف يرملزن ....ارمي النون
اعتبر النون مش موجودة أساسا
ايوة
هتنطقها
مو ولي

سُرُرٌ مَّرْفُوعَةٌ
المره دي تنوين...زي النون بالظبط
ايه اللي جه بعد النون(التنوين)...م
والميم من حروف يرملون
نفس الكلام أول لما تشوف يرملون....ارمي النون

هتنطقها......سررم مرفوعة
اعذروني انا باضطر أكرر الحرف علشان مش عارف ازاي أحط تشديد علي الحرف اللي انا عاوزه
انما تقريبا انت هتنطق اللي بغنة زي ما كتبت

ياللا بقي نشوف الادغام بغير غنة

مِّن رَّبِّهِمْ النون ايه اللي جه بعدها
ر
من حروف يرملون
أول ما تشوف يرملون....ارمي النون
والراء من حروف الادغام بغنة....لأ
الادغام بغنة .....ينمو
انما ر....ل من غير غنة
يبقي هتنطقها ازاي

مر ربهم

مِن لَّدُنْهُ

نفس الكلام
ايه اللي جه بعد النون
ل
يرملون....ارمي النون
ودي مش ...ينمو
يبقي ادغام بغير غنة
هتنطقها
مل لدنه

اعذروني في كلامي اللي علي المسطبة ده بس بحاول أقرب علي قد ما أقدر

خد بالك ان فيه استثناء للقاعدة

يعني النون مش هتاخد حكم الادغام في الحلات الآتيه

الدنيا....بنيان.....صنوان ....قنوان

بالرغم ان بعد النون جاءت حروف من حروف يرملون
الا ان النون هتاخد حكم اظهار
ويسمي اظهار مطلق

جرب تسمع
شرح الحكم بس من الشيخ

اسمع متكسلش

من هنـــــــا

أسأل الله ان يجبركسري ويغفر تقصيري
وما كان من خير فمن الله
وما كان من تقصير أو سهو أو خطأ فمني ومن الشيطان

اسمع بقي كالعاده للشيخ اللي بتحبه وافتح مصحف وركز

كده خلصنا نص مشوار النون الساكنة والتنوين

للحديث بقية ان شاء الله

مشكووووووووووووووووووووووووووور
ممتاز يا برنس
جااااااااااااامد

مشكووووووووووووووووووووووووور

» الحلقة الثالثة...النون الساكنة والتنوين...الاظهار الحلقي
» الحلقة الثانية حكم البسملة والاستعاذة